حكايات بابا كريم
ورقة امتحان
كريم : فيروز ... تعالي يا حبيبة بابي عندي
قصه جديده أحكيهالك .
فيروز: لأ أنا عايزه ألعب على الموبايل شويه.
كريم : سيبك من الموبايل وتعالي هحكيلك حدوته
حلوه.
فيروز : انت آخر مره قلتلي ان الحدوته اللي
بتكتبها عن الجن والعفاريت وأنا الصراحه بخاف.
كريم : لألأ .. مش دي اللي هحكيهالك .. انا
كنت هحكيلك عن قصة آدم والإمتحان.
فيروز : امتحان ايه ؟!
كريم: لأ اسألي اليوتيوب بقى ياللي لسه ماسكه
الموبايل.
فيروز: بجد عايزه أعرف
كريم : يبقى تسيبي الموبايل ونقوم نغسل
أسناننا و تيجي في حضني تسمعي القصه
الجديده.
***
كان ياما كان ، في كل عصر و كل أوان ، كان
فيه طلاب كتييييير بيستعدوا علشان يستلموا ورق الإمتحان.
المُعلم : كله استلم ورق الإمتحان ؟ الامتحانات
معروفه و أسألتها معروفه ، دلوقتي كل واحد يتفضل يعيش حياته و يحاول يحل الأسئله
دي.
سأل أحد الطلاب : هنحل في حياتنا بره ؟! يعني
ننقل من الكتاب عادي ؟!"
المُعلم : المهم تنقل من الكتاب الصح ، وتفهم
كويس الكلام اللي بتنقله "
سأل طالب آخر : طب و مدة الإمتحان اد ايه ؟
يعني امتى هنسلم ورق الإجابه ؟"
رد المعلم "هي دي بقى النقطه المهمه ،
كل واحد مدة امتحانه مختلفه عن التاني ، ومحدش هيعرف مدته اد ايه ، بس متقلقوش كل
واحد هياخد وقت يكفيه انه يقدر يجاوب صح ، ده لو متدلعش بقى وفضل يعمل حاجات تانيه
غير انه يحل".
***
عاد آدم الى منزله وقص ما حدث مع استاذه على والده فرد عليه
"انت عارف ان انا لسه بمتحن نفس الامتحانات
دي لحد دلوقتي ؟"
-"ازاي يعني ؟"
-"اخدت زمان ورق الامتحانات زيك كده ،
أول ما بقيت راجل ، ولحد دلوقتي لسه مجاش وقت تسليم ورق الاجابه".
-"طب ما حلو أوي الكلام ده ، يعني أنا
لسه الحياه قدامي ، العب بقى و أعيش حياتي ولسه بدري على الإمتحاناات"
-"طبعاً لأ ... تضمن منين يا فالح انك
ميعادك انت ميجيش بدري "
-"اذا كنت انت لسه لحد دلوقتي ميعاد
تسليم ورقك مجاش!"
-"بس المٌعلم قالك ان كل واحد زمن
امتحانه غير التاني ، ربنا يباركلك في زمن امتحانك بس متضمنش يابني"
-"طب انت شايف المفروض أعمل ايه ؟"
-"ابدأ بإمتحان الدين ، مش هيبقى صعب لو
ذاكرت صح ، اتبع تعاليم الدين صح وانت
هتنجح بسهوله"
-"بس يا بابا الدين أصلاً مش في
المجموع"
-"ضحكوا عليك يابني ، قالولك كده في
المدرسه ، بس الحقيقه ان ده أهم امتحان ، ده الإمتحان الوحيد اللي يا ينجحك يا
يضيعك"
-" بصراحه بقى يا بابا أنا هحل امتحان
الإقتصاد ، علشان أتعلم يبقى عندي فلوس كتيره"
-"الفلوس حلوه طبعاً ، دي زينة الحياة
الدنيا ، بس لازم تكون حالل امتحان الدين الأول"
-"العمر لسه قدامي ، هحل اقتصاد ويبقى
معايا فلوس كتير ، هذاكروأنجح بعدها في كل المواد اللي نفسي فيها ، وبعدها هبقى
أحل الدين ، كده كده هيكون سهل بعد الخبرات اللي هاخدها في المجالات كلها "
-"بالعكس .. هو سهل طول ما هو في قلبك
رقم واحد على طول ، انما لما تنحيه من حياتك خالص كده كل الامتحانات هتبقى صعبه ،
وامتحان الدين هيبقى أصعب و أصعب"
-"بابا .. أنا كبير بما فيه الكفايه اني
أقدر أدير حياتي بمعرفتي ، هحل الإقتصاد وفي الآخر هبقى أشوف موضوع امتحان الدين
ده "
-"ملكش عندي غير النصيحه ، وأنا بنصحك
علشان بحبك يا ابني ، ما الولاد كمان زينة الحياة الدنيا زي الفلوس".
***
فيروز :بابا .. هم الولاد ليه أحلى حاجه في
الدنيا مش البنات
كريم : لا يا حبيبتي .. أكيد مقصدش كده ، أنا
كان قصدي الولاد والبنات .. البنون زي ما ربنا قالها في القرآن
بسم الله الرحمن الرحيم
"الْمَالُ وَالْبَنُونَ زِينَةُ
الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِندَ رَبِّكَ
ثَوَابًا وَخَيْرٌ أَمَلً"
صدق الله العظيم
فيروز : يعني ايه الباقيات الصالحات ؟
كريم : يعني الأعمال الصالحه ، الخير اللي
بنعمله في الدنيا ، طاعة ربنا ، كل الحاجات الصح اللي بنعملها عند ربنا أحسن من
الفلوس و أحسن من الأولاد و البنات
فيروز : آآه .. امتحان الدين .. أهه أنا كده
فهمت .. يالهوي .. طب ده كده فعلاً هيسقط في كل حاجه لو سقط في الدين"
كريم : يا لهوك ؟!! اللهو .. هو ده اللي كان
حاصل مع آدم فعلاً بعد كلامه مع باباه لحد ما في يوم حصلتله حاجه غريبه.
***
"آدم"
-" ازيك عامل ايه ؟"
-"ضعت يا صاحبي ، فجأه جه ميعاد تسليم
ورق امتحاناتي ، وكنت حالل حاجات كتير ، بس لما رحت أسلم الورق متسألتش غير على
ورقة امتحان الدين .. وللأسف مكنتش لسه حليتها"
-"بس ليه جه ميعادك بدري كده ؟! وازاي
فجأه كده من غير مقدمات ؟!"
-"ملهاش علاقه يا صاحبي ، كل واحد وليه
ميعاد ، ووقت ما ييجي ميعادك هو امتحان واحد اللي هيفرق ، هو انت حليت امتحان
الدين ؟"
-"يا لهوي ... لأ محلتوش لسه ، طب بقولك
ايه .. ما تيجي نحل مع بعض و تسلم ورقتك معايا"
-"أنا مينفعش خلاص .. انا مبقتش موجود معاك
اصلاً .. انا ضعت خلاص"
قالها و اختفى مما أثار فزع آدم فاستيقظ من
نومه فجأه ، استغرف الأمر منه ثواني قليلة ليدرك انه كان يحلم ، ثم جرى على والده
يقص عليه رؤياه فرد عليه
"ما أنا قلتلك هو امتحان الدين ، لو
حليته صح ، كل حاجه هتبقى صح و هتقدر تنجح في كل المواد اللي هتذاكرها بعد كده ،
ولو حليته غلط مفيش اي امتحان تاني هينفعك"
-"بس يا بابا انا كده اتأخرت أوي في
الحل ، تفتكر ممكن أنجح لسه في الإمتحان ؟"
-"ولحد آخر لحظه قبل ميعاد تسليم الورق
ممكن تنجح ، احنا يا ابني بنعمل اللي علينا وبنحاول نحل ، لكن كده كده المراقب
العظيم هو اللي بيصحح الامتحانات ، ومحدش بينجح بمجهوده .. ده كله بينجح بالرأفه
بتاعته .. اسعى انت بس و ابدأ حل"
***
كريم : وتوته توته خلصت الحدوته ، سؤال صغير
بقى .. مين من شويه كانت مكسله ومرضيتش تصلي معايا العشا
فيروز : ماهو يا بابا انا لسه صغيره ، يعني
مش لازم أصلي من دلوقتي .
كريم : الفكره انك تتعودي تصلي من دلوقتي
علشان لما فجأه تستلمي ورقة الامتحان يبقى سهل عليكي تحليها.
***
#بقلم_كريم_صادق
#حكايات_بابا_كريم
#ورقة_الامتحان
التسميات: ورقة الإمتحان
حكايات بابا كريم
الكتابة اسلوب حياه
