يمكن مش غصب عنك

بتحب شغلك ؟

لأ منا فاهم انك راضي و الحمد لله ، بس انا مسألتكش انت راضي عن شغلك ولا لأ ، أنا بسألك.. بتحب شغلك ؟..مش عارف تجاوب..طب خليني أساعدك .لو انت فجأه ورثت عشرة مليار جنيه ..هتستمر في نفس شغلك .. أو حتى في نفس المجال ؟!

أنا بحسد النسبة اللي مش هتعدي عدد صوابع الايد الواحده من عشرة فالميه اللي هيقولوا اه بحب شغلي ، علشان انا شايفهم محظوظين بجد ، أما الغالبية العظمى من خلق الله فبيتم اغتصابه يومياً بإسم الشغل ..متستغربش أوي كده من الكلمة أنا مش ببالغ ولا حاجه هو يعني ايه اغتصاب اصلاً..لو فكرت فيها شويه هتلاقي ان الاغتصاب عباره عن علاقه بين طرفين أو أكثر بيتم اجبار أحد أطرافها على فعل معين لا يريده أو بالبلدي كده (غصب عنه).

خلينا نتكلم عن النسبة الأكبر من اللي جاوبوا بـ لأ - و اللي انا منهم- هتلاقيهم كل يوم بيصحوا غصب عنهم بدري علشان يلبسوا غصب عنهم Dress Code معين ده لو مكنش Uniform موحد كمان و بعدها ينزلوا من بيوتهم و يركبوا عربياتهم أو مواصلات يمشوا بيها غصب عنهم في الزحمه أو في جو زفت أو غيره علشان يوصلوا أشغالهم اللي احنا اتفقنا انهم مش بيحبوها يعني برضه بيعملوه (غصب عنهم) .

كل اللي فات ده نقدر نقول عليه (سُنِة الحياة) ومفيش دليل على الكلام ده أكتر من كلام ربنا في القران الكريم " لَقَدْ خَلَقْنَا الْإِنسَانَ فِي كَبَدٍ" و الكبد هنا بمعنى مشقة و تعب ، أمال يبقى فين المشكلة..المشكلة لما بننسى القاعده الأساسية (احنا بنشتغل علشان نعيش) مش (بنعيش علشان نشتغل) ولما ده بيحصل بنبدأ نتصرف تصرفات غير منطقية ، تلاقي واحد بيموت نفسه في شغله لدرجة انه بييجي على صحته و على بيته و عياله علشان يتقال بس ان فلان ده بيستحمل و بيقدر يشتغل تحت ضغط.. علشان ايه يعني ده كله ؟! .ما تأدي اللي عليك و تجتهد في شغلك من غير ما تنسى ان "لبدنك عليك حق" وده طبعاً مش أنيل من المتملق اللي طول الوقت يمجد مديره في أي حاجه يعملها سواء كانت صح أو غلط لمجرد انه طمعان في مرتب أعلى أو منصب معين أو حتى أجازه منه ،المشكلة في المثالين اللي فوق ان النوعين دول لما تواجههم يقولولك هعمل ايه مهو (غصب عني) ..

طب خلينا نفكر في شوية حاجات كده ناس كتير بعملها تحت اسم (غصب عني) يعني مثلاً يا ترى فيه كام واحد في مصر بيدفع رشوه (غصب عنه) علشان يخلص مصلحه بدري شويه من غير ما يتبهدل في شوية اجراءات روتينية ، طب يا ترى فيه كام مدرس بيضطر (غصب عنه) انه يلجأ للدروس الخصوصية علشان يعرف يأكل عياله اللي تقريباً مبقاش يشوفهم بسببها و طبعاً ممكن نقيس على الدكاتره و عيادتهم الخاصه نفس الكلام ، طب تعرف انت كان ست بتتعرض (غصب عنها) للتحرش بدرجاته المختلفه و غصب عنها مش قادره تقول لجوزها أو أبوها لإنها خايفه انه يكون رد فعله "متنزليش من البيت تاني" ، طب تعرف كام واحد بيضطر (غصب عنه) يضحك أو حتى يبتسم في وش مديره على أي إفيه بايخ يقوله لمجرد إنه خايف لا يحطه في دماغه ، طب يا ترى فيه كام واحد اتجوز (غصب عنه) واحده مبيحبهاش علشان ميزعلش أهله اللي اختاروهاله ، أو بالعكس كام واحده اتجوزت (غصب عنها) واحد مش بتحبه علشان مقدرتش تقول لأهلها انها بتحب واحد تاني مش جاهز بكنوز علي بابا اللازمه للجواز في عصرنا الحالي، طب كام واحد بيشتغل (غصب عنه) شغلانه وهو عارف انه لو فضل فيها 50 سنه كمان مش هيحقق أي حاجه من طوحاته ، طب كام واحد بيضطر(غصب عنه) ياكل نفس الأكله اللي بيكرهها عند حماته مثلاً علشان اول مره اتكسف و جاملها وقالها "احلى محشي أكلته في حياتي" و من ساعتها و هي بتعملهوله مخصوص كل ما ييجي .😂

من فتره كنت قريت موقف لـ(أم كلثوم) في مقال كتبته إحدى صديقاتي الفيسبوكيين كنت أول مره أعرفه ، لما كانت (كوكب الشرق) طالعه على السلم و قابلت (أحمد رامي) و هو نازل ووقف فجأه فسألته "وقفت ليه يا (رامي)؟" فقالها "أصل روحي طالعه" . ممكن لو أي حد حضر الموقف ده يعتبره هزار لطيف أو مجامله ظريفه ، بس أم كلثوم كانت عارفه ان (رامي) بيحبها و عارفه ان حبه ليها ده هو المحرك الأساسي اللي كان بيدفعه لكتابة أجمل الكلمات ليها و اضطرت (غصب عنها) تعكر نقاء حياتها المخلصة لزوجها الدكتور (حسن الحفناوي) لإنها عارفه انها لو منعته عن تلك الـ(إطراءات) هتلاقي الاف يتمنوا ينالوا شرف الكتابة لأم كلثوم بس مش هتلاقي اللي يكتبلها بشغف الحب بتاع (رامي).

اخر سؤال هسأله بقا .. هل فعلاً كان غصب عنهم ؟! 🤔.. مش يمكن الراجل لو كان مضحكش على نكت مديره البايخه كان ممكن الموضوع يعدي عادي و ممكن كمان المدير ياخد باله انه دمه بايخ ، ومش ممكن الست اللي اتحرشوا بيها لو كانت عملت محضر في القسم علشان تاخد حقها بشكل قانوني أو حتى قالت لجوزها أو أبوها علشان تاخد حقها بطريقة قانون الغابه كان زمانها ساعدت في حل - ولو جزء بسيط- من مشكلة التحرش ، طب لو كان الراجل قال لحماته من أول يوم ان المحشي بتاعها وحش مش يمكن متعملوش تاني في اليوم اللي بيزورهم فيه أو على الأقل كانت اتعلمت بيتعمل ازاي بدل ما الغلبان لحد دلوقي بياكله بالمعلقة .

أكيد فيه حاجات (غصب عننا) زي الموت و القدر و المرض و غيره بس لو ركزنا شويه هنلاقي ان ربنا مدينا في الدنيا حياة واحده نعيشها فحاول قدر الامكان متضيعش متع الحياه تحت بند (غصب عنك) في حاجات كتيرلو ركزت شويه هتلاقيها (يمكن مش غصب عنك).

فيه أمثله كتير تانيه كان نفسي أكتبها بس للأسف مقدرتش أكتبها (غصب عني) علشان أحافظ على شغلي.

#يمكن_مش_غصب_عنك
#الكتابة_إسلوب_حياة
#يد_تكتب_ويد_تحمل_السلاح
#يد_تكتب_ويد_أرهقها_السلاح
#بقلم_كريم_صادق
#أم_كلثوم