الطاقة لا تكفي

زمان كان فيه لعبه في الأتاري ال Nintendo 64 -والمعروف لدى المصريين جميعاً بإسم الأتاري الفاميلي لسبب ما انا مش عارفه- اسمها كابتن ماجد اللي هي captain Tsubasa اصلاً و تسوباسا بالياباني يعني الجناح (اللي هو رمز الحرية مش اللي هو محمد صلاح في ليفربول) بس العرب لما حبوا يعربوا اللعبه حطوا التاتش بتاعهم و بقا اسمه ماجد كامل (والكمال لله وحده :D )

المهم اللعبه دي لعبه خياليه بكل ما تعنيه الكلمه .. ممكن بسهوله تبدأ الماتش بتسديدة الزوبعه ولا العاصفه ولا أي قلبة جو و تدخل جون مضمون مش بس كده ..انت كان ممكن تستعمل نفس القوه دي في التمريره ، كل المطلوب منك انك تقوله تمريره طويله مش عاديه هتلاقي الكوره لفت الملعب كله و أي لعيب هيحاول يخطفها هتيجي فيه هتطيره الا اللعيب بتاعك هتلاقيه بيستلمها على صدره بمنتهى التناكه ولا كأن فيه حاجه (ياسبحان الله..مش كانت كوره رهيبه من شويه و كأنها جمره من النار) ..

كل الهري ده كان ممتع بالنسبه ل(طفولتي البريئة) ايام ما كنت بلعب الهبل ده

بس الجزء اللي كانت بتنتهي فيه المتعه دي لما كنت تباصي الكوره ل (ماجد الشبح) و تيجي تعمل كوره من كور اللهب دي فيرد عليك و يقولك برخامه

"الطاقة لا تكفي"

يا عم طب تعالى على نفسك و هات الجون ده و هبقى ابدلك

"الطاقة لا تكفي"

طب اديني واحده تمريره طويله بعرض الملعب لواحد تاني و هو يخلصها

"الطاقة لا تكفي"

طب واحده (المناوره حلقات) يا عم من فوق الواد و نستعرض محنا كسبانين

"الطاقة لا تكفي"

يا عم انا هسامحك لو حاولت تعملها و اتقطعت

"الطاقة لا تكفي"

فبتضطر تباصي الكوره لأقرب واحد جنبك و تفضل مستني الدقائق تعدي لحد ما الماتش يخلص و يجيله طاقه جديده

ودي كانت أكتر حاجه شايفها مش واقعيه وانا طفل بس لما كبرت أكتشفت ان دي اكتر حاجه واقعيه في اللعبه لإن شفت ناس كتير وصلت تقريباً لنفس المرحله في حياتهم

مرحلة "الطاقة لا تكفي"

ده تجمع عائلي ولازم تكون موجود مش مهم ان ده يوم الأجازه اللي انت مستنيه

-"الطاقة لا تكفي"

انت فاكر انت الوحيد اللي قرفان في شغلك..الناس كلها قرفانه بس .. مينفعش كل شويه تقول انك شايف نفسك في مكان و مكانه أحسن..رد عليا مش بكلمك

-"الطاقة لا تكفي"

هاتلنا رامز جلال و البرنامج الثقيل بتاعه اللي هو عباره عن مجموعه من الاعلانات يتخللها فواصل من مقلب بيتكرر كل يوم هو هو في رمضان..

معلش يا جماعه انا نفسي اشغله علشانكم بس للأسف "الطاقة لا تكفي"

المشكله معايا ان الموضوع بدأ يخش على اكتئاب بسيط ..مبقاش فيه متعه حتى في الحاجات اللي كانت بتبسطني زمان

كريم ..تعالى نلعب كوره

"الطاقة لا تكفي"

كريم ...مش هتكتب موضوع جديد بشكل ساخر

"الطاقة لا تكفي"

كريم ... مش هتكمل الروايه اللي بقالها سنه

"الطاقة لا تكفي"

خلينا متفقين ان كلنا طاقتنا بقت لا تكفي..

بس كل واحد ليه أسبابه..

اللي مش لاقي يأكل عياله

واللي مرمي في سجن ظلم

واللي مش لاقي شغل

واللي بيشتغل بس مديره مضطهده

واللي مش عارف يتجوز

واللي مش مرتاح في جوازه

واللي شاف جحود عياله عليه

واللي مشافش اصلاً عياله

وغيرهم كلهم طاقتهم اصبحت لا تكفي

شكراً كابتن ماجد كامل

عذراً ايها الناس جميعاً

فالطاقة لا تكفي

#الكتابة_إسلوب_حياة
#كابتن_ماجد
#أتاري
#الطاقة_لا_تكفي
#يد_تكتب_ويد_تحمل_السلاح
#بقلم_كريم_صادق