كيكي على العالي و كيكي على الواطي

صحيت من النوم النهارده بفتح الفيسبوك لقيته كله مليان فيديوهات لناس عماله ترقص جنب عربياتها و هي مشغلة أغنية غريبة كده.. فدخلت أدور على جووجل علشان افهم الناس اتهبلت ليه..اتضح ان ده تحدي جديد على زي تحدي الثلج اللي كان من كام سنة اسمه تحدي كيكي ... الحقيقة الفضول قتلني أعرف مين كيكي دي..و عرفت ان كيكي دي أغنية جديده غناها مغني الراب الكندي Drake لـ Keshia Chanté (كيكي) حبيبته الأولى و اللي كانت معاه وهو صغيرين في مدينة توريتو و كانوا (متصاحبين) في مرحلة المراهقة وهي مغنية برضه بس بتشتغل مذيعة برضه و في انترفيو عملته (كيكي) لـ(دريك) في 2013 قالها فيه "انتي عارفه انك من أوائل الناس اللي كنت (بكراش) عليهم و غنيتلك راب قبل كده...

و بالفعل دريك غنى في 2009 ريمكس لأغنية كيشا Fallen وقال فيها Keshia, Keshia, do you remember the old us? You just hold it down for your boy until the plaques arrive that's why I love you"."

عرفنا مين كيكي..نرجع بقى لرقصة التحدي.. انتوا متخيلين البنزين اللي كلنا كنا هنعيط لما سعره زاد علينا بقينا بنهدره في الهوا كده..طب بلاش البنزين ،انتوا متخيلين كمية الحوادث اللي ممكن تحصل بسبب الهبل ده..

أنا متخيل كده حوار بين واحد و مراته وهم خارجين في العربية بسبب موضوع كيكي ده ممكن يبقى ازاي..

"حبيبي..اركن على جنب..عايزه أعمل كيكي"

-"ههههه أكيد تقصدي تقولي كيكه... طب وليه تتعبي نفسك يا حبيبتي مانجيب جاهز على طول"

-"انت السمع ايه؟! بقولك كيكي..عايزه أعمل كيكي"

-"طب امسكي نفسك شويه يا حبيبتي لحد ما نوصل البيت مش ناقصه (زروطه)..بس والنبي مش عايزين روايح غريبه بقى و انا إن كان عليا هسوق بسرعه.."

-"ايه القرف ده ...يا دي الجهل اللي انت فيه.. انا بقول كيكي يابني ادم مش كِكي "

-"معلش ..حقك عليا...اعذري جهلي يا وزيرة الثقافة و فهميني.. مين كيكي دي؟"

-"دي أغنيه جديده ..خد حط الفلاشه دي في اليو اس بي و انت هتفهم"

-"أيوه بتقول ايه الأغنية دي يعني..و أركنلها على جنب ليه؟!"

-"Kiki, do you love me? Are you riding?

Say you'll never ever leave from beside me "

- "طب مانتي كده مجوبتيش على سؤالي...مين كيكي برضه اللي بيغنيلها؟!!"

-"لأ هو انا ..مش عارفه بالظبط ..بس واضح انها واحده بيحبها.."

-"طب ما كاظم لما بيغني أحلى أشعر لنزار القباني مبنركنلوش على جنب يعني...بنسمعه عادي و احنا سايقين"

-"لأ مهو الأغنية دي ليها رقصه مشهورة و طالعه موضه...وهي ببساطه ان اللي جنب السواق بينزل و السواق بيسوق جنبه بالراحه و يصوره و هو بيرقص جنب العربية و يحاول يلحقها بخطواته و بعدين نحط الفيديو على النت علشان نشوف مين أحسن واحد بيرقص عليها"

-"يعني انتي عايزاني أمشي جنبك بالراحه و انتي تطلعي تجري جنب العربية كإنك بتركبي أتوبيس نقل عام مش في محطته"

"-مش هجري هجري يعني أنا هرقص"

-"وعايزاني أركنلك على جنب علشان تنزلي ترقصي في الشارع "

-"اه"

-"وعايزاني أنا أصورك فيديو و انتي بتترقصي في الشارع و أحطهولك على النت"

-"على فكره دي حاجه عالمية ...والعالم كله بيعمل كده"

-"ده انتي طلعتي مش عايزه كيكي...ده انتي عايزه حد يربيكي"

****