الصب في مصلحة المواطن

حوار تخيلي بين المواطن و الحكومة

المواطن: عملنا بدل الثورة اتنين و أخيراً بقا هنقضي على الروتين و الفساد وهنبقا أغنيا و نجيب شقق وعربيات و نهيص.

الحكومة: انت مش واخد بالك ان الثورتين اللي انتوا عملتوهم دول خلوا فيه انهيار اقتصادي و الدولار بقى في العلالي و اضطريتونا نعًوِم الجنيه

المواطن:انا مش فاهم كل الكلام ده .. انا بسأل هنجيب عربيات و نهيص ولا لأ

الحكومة: فيه انهيار في الإقتصاد و الدولار غلي جداً و شرا العربيات هيبقى زي فريضة الحج كده لمن استطاع اليه سبيلاً

المواطن: يعني بعد كل ده مفيش عربيات... خلاص بقا هركب ميكروباصات زي ما انا و أمري لله

الحكومة: لأ مهي تسعيرة الميكروباصات هتغلى

المواطن: ليه بقا ان شاء الله؟!!!

الحكومة: اصل الدعم ده هيودينا في داهيه..يعني على سبيل المثال هفترض معاك ان رغيف العيش ب5 قروش انت كمواطن مش معاك غير قرشين بس انا كدولة المفروض ادفعلك 3 قروش..طب منين..وانا اصلاً معنديش

المواطن: انت عمال تتوهني يمين و شمال..انا مش فاهم ايه علاقة رغيف العيش بالدعم بتسعيرة الميكروباصات

الحكومة: انا قصدي ان احنا هنرفع أسعار البنزين و المنتجات البترولية في خطتنا لرفع الدعم بالتدريج وكله في النهاية هيصب في مصلحتك بس تستحملنا شويه لما الميكروباصات تزود عليك التسعيرة.

المواطن: بلاها ميكروباصات خالص.. هتنيل أركب مترو.. لو هو ده اللي هيريح الحكومة .. احنا عنينا للحكومة و ظروف البلد برضه

الحكومة: هو انا مقولتلكش..مش تذكرة المترو بقت ب 7 جنيه

المواطن: مش هسألك ليه و مش هركب زفت... هترزع في بيتي و بلاها نزول منه خالص ولا عايز أشوف حد ولا حد يشوفني

الحكومة: انت بتتكلم كده ليه!! طب ايه رأيك بقا هنرفع أسعار الكهرباء و المياه و ابقى وريني هتقعد في بيتكم ازاي

المواطن: مش قاعد في بيتي .. هنزل الشارع و هطلع همي في السجاير

الحكومة: واللهِ عيب بقى.. يعني انا هرفع أسعار كل الحاجات دي و مش هرفع السجاير..ده حتى يبقى عيب علينا و اللهِ

المواطن: انت قاصد تستفزني يعني .. عايز تشلني؟!

الحكومة: لأ امسك نفسك كده يا بطل.. انت لو جرالك حاجه مش هتلاقي سرير في مستشفى حكومي علشان مفيهاش امكانيات و المستشفيات الخاصة محتاجه ميزانية رجال أعمال

المواطن: حتى المرض بقا مش من حقي..طب أعمل ايه.. أعيش ازاي و انتوا بتزودوا عليا كل حاجه

الحكومة: اهدى بس كده.. انت بس اللي الدنيا لما ريحتك نسيت كنت عايش في ايه قبلي..نسيت الفطار في رمضان على نور الشموع و طوابير البنزين ..انت عارف في البلاد المتقدمة أسعار الكهرباء و البنزين كام ؟!

المواطن: طب ما تدونا مرتبات زي اللي بياخدوها و احنا ندفع زيهم و أكتر لو عايزين.

الحكومة: ده بدل ما تحمد ربنا ان محصلناش زي سوريا و العراق .

المواطن: يعني وقت المرتبات تقولي اللي حصل في سوريا و العراق ووقت زيادة الأسعار تقولي الدول المتقدمة .

الحكومة: انت بس اللي مش قادر تفهم ان الزيادات دي كلها بتصب في مصلحتك.

المواطن: أنا مش عايز أسمع الكلمة دي تاني.. علشان لو قلت الكلمة دي تاني هولع في نفسي بجاز.

الحكومة: طب هنرفع أسعار البنزين و المواد البترولية تاني.. و ابقى شوف هتولع في نفسك ازاي

**المواطن يغشى عليه في الحال**

#الصب_في_المصلحة
#بقلم_كريم_صادق
#يد_تكتب_ويد_تحمل_السلاح
#احمي_مصلحتك
#غلاء_الأسعار