رأسي يمنع رقصي

من كام يوم فاتوا كنت معزوم في فرح واحد صاحبي

وطبعاً فرح صاحبي يعني رقص للصباح الباكر..

بس اللي حصل كان غير كده...

انا نمت شويه بعد العصر و راحت عليا نومه

وصلت الفرح متأخر كانت الساعه داخله على 10 بالليل

يا دوبك سلمت على العريس و العروسه و البوفيه بدأ

متقلتش في العشا بقا علشان أعرف أرقص.

منا لازم أوجب مع صاحبي اللي ضم على نادي المغفلين جديد

وضحى براحة دماغه اللي كانت عندنا زمان كلنا لحد ما شربنا من الكاس اللي لابد منه

لما جينا بقا للرقص..اكتشفت اني مش برقص..

اكتفيت اني وقفت خارج الدايره اللي بتتعمل حوالين العريس

و فضلت اصقف مع أغاني معرفهاش و اصقف بحماس أكتر مع الأغاني اللي أعرفها

مش قادر ارقص..مش عارف أرقص

هو احنا كبرنا !!

اه انا داخل على ال30 بس ايه المانع اني ارقص.

يعني هو سني ده ميخلينيش أرقص ؟ !!

اه بحكم الوظيفه الواحد غصب عنه بيبقى مشدود طول الوقت

بس ده ميخلنيش أقدر ارقص في الأجازه !!

اه كل كام يوم أسمع اسم واحد أعرفه مات شهيد

بس مش ده اللي احنا كلنا بنتمناه...يعني المفروض افرحله؟!

الفرحه دي متخلينيش أرقص؟ !!

حالة البلد الاقتصادية زي الزفت و الجنيه المصري بقا ملطشه لأي عمله

بس ده ميخلينيش أرقص ؟ !!

البنزين اللتر بقا ب 5 جنيه وطبعاً ده شئ ضايقنا كلنا

بس ده ميخلينيش أرقص ؟ !!

على طول قلقان من المستقبل ، وبحاول اتشعبط في الشريحه الضعيفه اللي اتبقت في الطبقة الوسطى علشان مش ناوي أسرق ولا اخد رشاوي علشان الحق الطبقة الراقيه ولا عايز اسيب نفسي لما اقع على جدور رقبتي مع الطبقة الفقيره..

بس التفكير ده ميخلينيش أرقص ؟ !!

ياريتك يا صاحبي اتجوزت بدري شويتين ثلاثه ..

كنت ممكن ساعتها أوجب معاك بدل ما (رأسي يمنع رقصي)

#أين_رقصي
#ميخلينيش_أرقص
#خواطر
#رأسي_يمنع_رقصي